Midako pa ang kinatibuk-ang utang sa gobyerno sa Pilipinas ngadto sa P16.31 trilyon sa katapusan sa Enero 2025, basi sa datos sa Bureau of Treasury (BTr).
Mas taas kini og P261.47 bilyones o 1.63% kon itandi niadtong Disyembre 2024, tungod kay mas nidako ang utang sa gobyerno ug mitaas ang balor sa mga utang sa atong nasod tungod sa pag-us-os sa peso.
Namatikdan usab sa Treasury nga ang balor sa peso kay mihuyang ngadto sa P58.375 sa katapusan sa Enero 2025 gikan sa P57.847 sa katapusan sa 2024.
Sa kinatibuk-an, anaa sa 67.9% niini gikan sa internal nga utang samtang ang nahabilin nga 32.1% gikan sa external nga utang.
Ingon man sa katapusan sa Enero, ang utang sa nasud misaka ngadto sa P11.08 trilyon samtang ang utang sa gawas sa nasud miulbo usab ngadto sa P5.23 trilyon.
Bisan pa niini, ang BTr miingon nga ang utang sa gobyerno nagpabilin nga madumala ug nahisubay sa target nga suportahan ang pagtubo sa ekonomiya samtang gisiguro ang pagpadayon sa piskal.
Matud pa usab sa mga economic managers nga dili angay kabalak-an ang nagkadako nga utang sa nasud basta magpadayon ang pagtubo sa ekonomiya.
