Gipahibalo sa Holy See Press Office nga ang Mass Pro Eligendo Romano Pontifice o Misa alang sa pagpili sa bag-ong Santo Papa ipahigayon sa Miyerkules, Mayo 7, 2025 sa alas 10:00 sa buntag (4 p.m., Philippine time) sa St. Peter’s Basilica, pinangulohan ni Cardinal Giovanni Battista Re, Dean sa College of Cardinals.
Samtang, sa Lunes, Mayo 5, 2025, alas 5:30 sa hapon. (11:30 p.m., Philippine time), ang pagpanumpa sa mga opisyal ug kawani sa Conclave ipahigayon sa Pauline Chapel sa Vatican Apostolic Palace.
Lakip sa nanumpa mao ang mga pari, madre, doktor, guwardiya, ug ubang mga personahe sa maong dapit.
Pormal nga magsugod ang Conclave sa Miyerkules, Mayo 7, alas 4:30 sa hapon. (10:30 p.m.,Philippine time) kung kanus-a mosulod ang Cardinal Electors sa Sistine Chapel aron sugdan ang proseso sa pagbotar sa sunod nga Santo Papa.
Ang mga Cardinals magsul-ob ug tradisyonal nga ecclesiastical attire ug maglakaw sa usa ka espirituhanong prosesyon paingon sa Sistine Chapel samtang ang Veni Creator Spiritus gikanta.
Hugot nga seguridad ang ipatuman ug limitado lang ang mga tawo nga pasudlon sa Conclave. (BOMBO IRENE ARDIENTE)
