Gipasirado sa Department of Migrant Workers (DMW) 7 ang usa ka visa consultancy firm sa Cebu Business Park tungod sa giingong illegal recruitment.
Giila ang maong kompanya nga Visa to America Manila Inc. – Cebu, gipasanginlan nga nang-recruit og mga magtutudlo ug hospitality workers alang sa mga trabaho sa Estados Unidos nga walay balido nga recruitment license.
Sumala sa DMW 7, ang kompanya nag-pabayad sa mga aplikante og placement fee nga $5,400 ngadto sa $8,500. Agig balos, gisaaran sila og mga trabaho nga adunay suweldo gikan sa $40,000 hangtod $100,000 matag tuig.
Gitanyag sa kompanya ang J1 ug H1B visa, partikular nga gipunting ang mga propesyonal sama sa mga magtutudlo.
Giklaro ni DMW 7 Director Jhoaden Lucero nga samtang lehitimo ang negosyo sa visa consultancy sa kompanya, ilegal ang pag-recruit sa mga trabahante nga walay pagtugot sa DMW.
Ang pagsira sa Sugbo kabahin sa koordinasyon nga operasyon sa tibuok nasod batok sa walo ka mga sanga sa Visa to America, apil na ang main office niini sa Pasig City.
Giawhag ni Lucero ang publiko nga magmatngon sa pag-aplay og trabaho sa gawas sa nasud. Gitambagan niya ang mga aplikante nga pag-aplay lamang sa mga ahensya sa pagrekrut nga lisensyado sa DMW, ug ikumpirma nga giaprobahan sa ahensya ang mga job order.
Dugang usab niini nga mamahmo usab nga bisitahon ang rehistradong adres sa ahensya ug makanunayong mangayo og resibo nga narehistro sa Bureau of Internal Revenue alang sa bisan unsang bayad. | via Bombo Nathaniel Sandoval
