CENTRAL VISAYAS-Magpadala ang Visayas Command (VISCOM) og duha ka combat utility helicopters sa Negros Oriental aron mapausbaw pa ang ilang mga paningkamot alang sa pagsiguro sa kalinaw sa umaabot nga Barangay ug SK Elections sa Negros Oriental ug aron madugangan ang ground forces sa probinsiya.
Mao kini ang gibutyag ni Lieutenant General Benedict M Arevalo PA, ang Commander sa VISCOM.
Matod niini nga ang deployment sa duha ka air assets sa Negros Oriental kabahin sa ilahang contingency kung adunay mahitabong dili maayong mga insidente, ilabi na sa panahon sa pagdala sa election returns human sa voting period.
Ang maong mga air assets nagtumong sa paghatag og hinanaling air support sa ilahang mga tropa sa yuta nga motubag sa bisan unsang mutumaw nga mga insidente.
Gibutyag usab sa opisyal nga ang duha combat utility helicopter gilangkuban sa usa ka Blackhawk ug usa ka Bell Helicopter.
Ang maong mga air asset ipahimutang nang daan sa Camp Leon Kilat sa Tanjay City ug ibutang ubos sa operational control sa 302nd Infantry Brigade.
Dugang pa nga ang seguridad sa Negros Oriental alang sa BSKE 2023 mas gipahugtan samtang ang gobyerno nagpadayon sa pagbubo ug dugang pwersa.
Kahinumduman nga niadtong Oktubre 18, dugang 181 ka tropa nga gilangkuban sa AFP personnel gikan sa VISCOM, PNP personnel gikan sa PRO7, ug personnel gikan sa Coast Guard District – Central Visayas ang nangabot sa probinsiya aron mo-duty atol sa piniliay.
Sa pagkakaron, anaa na sa 2,719 ka AFP personnel ang na-deploy sa probinsiya, kung diin 1,285 niini ang kasamtangang nagpahigayon og mga operasyong militar sa outskirt nga mga komunidad sa probinsiya, aron bantayan ang mga kalihukan sa CPP-NPA nga mahimong makabalda sa proseso sa eleksyon sa maong mga lugar.
Samtang, 1,394 niini ang kasamtangang gipakatap aron suportahan ang PNP sa pagpatunhay sa COMELEC checkpoints, pag-secure sa mga polling center sa panahon sa eleksyon, ug pagsiguro sa pagdala sa mga election paraphernalia ug ang nahabilin nga 40 ka mga opisyal ug mga personahe gipakatap sa pagdumala sa Election Monitoring Action Centers (EMAC) ug Joint Security Control Center (JSCC) sa probinsya.
Gipalanog usab ni Lt. Gen. Arevalo ang ilahang pasalig sa pagsiguro sa kaluwasan ug seguridad sa katawhan ug ingon man ang kalampusan sa BSKE sa Negros Oriental.
Una niini, ang Negros Oriental gibutang ubos sa COMELEC control sulod sa election period.
Ang polling body adunay siyam ka election watchlist list areas kung diin 1 niini gi-categorize isip Area of Concern tungod sa grabeng panag-indigay sa politika, samtang ang laing walo gi-categorize isip Areas of Immediate Concern tungod sa mga tahong nga adunay kalambigitan sa CPP-NPA.
