CENTRAL VISAYAS-Nagpadayag sa ilang kaandam ang Visayas Command (VISCOM) sa pagsuporta sa Commission on Elections (COMELEC) ug sa Philippine National Police (PNP) sa pagsiguro sa malinawon nga pagpahigayon sa Brgy ug SK Elections sa Negros Oriental.
Kini ang pamahayag ni Lieutenant General Benedict M Arevalo PA, ang Commander sa VISCOM, nga sila adunay usa ka contingency alang niini nga sitwasyon.
Dugang pa, nga nagplano ug naghimo na usab sila sa gikinahanglan nga koordinasyon sukad sa Marso niining tuiga, hinungdan nga andam ug aduna na silay igong personnel nga mosuporta sa COMELEC ug PNP sa pagsiguro sa malinawon ug luwas nga pagpahigayon sa Barangay ug SK Elections sa Negros Oriental.
Kini nga pamahayag gihimo ni General Arevalo, human sa pag-anunsyo ni COMELEC Chairperson, George Garcia nga ang COMELEC En Banc nakahukom nga ipadayon ang Brgy ug SK Elections sa Negros Oriental karong Oktubre 30, nga nagbutang sa tibuok probinsya ubos sa COMELEC control.
Kung kahinumduman, nga nakakuha ug atensyon ang Negros Oriental sa tibuok kalibutan human sa insidente sa pagpamusil niadtong Marso 4 sa pinuy-anan ni Gobernador Roel Degamo sa Pamplona, Negros Oriental nga miresulta sa kamatayon sa Gobernador ug siyam (9) ka mga sibilyan.
Kung diin, pulitika ang hugot nga gikonsiderar nga nag-unang motibo sa maong insidente.
Subay niini, gidugang pa ni Lt Gen Arevalo nga sukad sa maong insidente nga mikalas sa kinabuhi ni Gobernador Roel Degamo ug 9 ka sibilyan, walay hunong ang seguridad sa probinsiya, ug ang checkpoints ug mobility patrols sa kasyudaran ingon man ang security patrols sa rural nga mga lugar ang gihimo bisan hangtod sa kasamtangan.
Hinungdan nga nagpabilin nga kontrolado sa gobyerno ang kahimtang sa kalinaw ug kahusay sa probinsya, nga nahimong lig-on pagkahuman sa pagkasikop sa mga nag-unang suspek sa insidente.
