METRO MANILA-Gi-tagsa-tagsa ni Vice President Sara Duterte ang giingong mga bakak ni Philippine National Police (PNP) chief Police General Rommel Francisco Marbil sa iyang mga pamahayag kalabot sa pag-recover sa iyang mga security personnel.
Sa open letter nga gipagawas ni Duterte, una niyang giklaro nga wala siyay problema sa PNP Chief nga tangtangon ang iyang 75 ka security personnel nga nagsilbing security team sa OVP.
Apan ang bise presidente giingong dili makasabot sa nagkadaiyang estorya ug pasangil ni Marbil ug sa padayong pagpangilad sa katawhan.
Gihatagan og gibug-aton ni Duterte nga ang Vice Presidential Protection Division nga ubos sa Police Security and Protection Group (PSPG) base sa kamanduan sa NAPOLCOM tinuyo nga gihimo aron dili mabalaka ang PNP Chief sa seguridad sa Bise Presidente. “Kaya nga may VPPD para walang hablutan at hindi maabala ang trabaho ng lokal na police,” matod ni Duterte.
Kahinumduman nga niingon ang kadagkoan sa PNP nga sa wala pa nila tangtangon ang security details sa bise presidente, ila una nga gi-request ang OVP kung mahimo ba kining i-pull out tungod kay nagkinahanglan sila og dugang police forces sa National Capital Region, ug matud pa nila nga ang OVP miuyon.
Apan sa suwat ni VP Sara, giingong walay request ug gikuha dayon ang iyang security team apan wala siya makiglalis kay matud pa ni Duterte, dili kini makaapekto sa iyang katungdanan isip bise presidente.
Kabahin sa giingon sa PNP Chief nga wala silay nakitang hulga sa kinabuhi sa bise presidente busa walay problema kon maminusan ang iyang seguridad, gipaambit ni Duterte ang pipila ka mga hulga kaniya ug ingon man sa iyang pamilya.
Pipila niini naglakip sa malisyosong pagpagawas sa video footage dihang didto siya sa NAIA diin gikuhaan usab og video ang iyang asawa ug menor de edad nga anak, nga giisip niyang dakong hulga sa iyang seguridad.
Dugang ni VP Duterte ang mga operatiba sa PNP bag-o lang usab miadto sa iyahang gipuy-an aron mag-‘casing.’ kung diin anaa usab ang iyahang mga anak, gitumbok niini nga kung dili pa gumikan sa buotan nga opisyal sa asosasyon sa mga tag-iya sa balay dili sila mohunong niini, ug wala na siya makabalo kung unsa pa ang mahitabo.
Dinhi gikuwestiyon sa bise presidente kon unsay kahulogan sa “hulga” sa kapolisan ug kon tinuod man nga walay hulga kaniya nganong gibilin man niya ang 45 ka mga PNP personnel nga gipili mismo ni Marbil.
Matud pa ni Duterte, dili ba mas hulga kung ang pagpanghasi gikan mismo sa mga kawani sa gobyerno.
Gihatagan og gibug-aton ni Duterte nga si Marbil, “batas ka lang at hindi ka diyos.”
Nunot niini, gitumbok usab ni Duterte nga kadudahan nga 38 sa 75 ka mga PNP personnel nga napili nga masakop sa relief order sa PNP Chief mao ang mga pulis gikan sa Mindanao nga gibalhin sa National Capital Region (NCR) nga daw walay igo nga pulis sa Mindanao.
Giinsister ni Duterte nga ang relief sa mga PNP personnel niabot human siya ni-resign isip secretary sa departamento sa edukasyon ug human kuno niya itandi ang SONA sa usa ka katalagman nga panghitabo, ug human nigawas ang cocaine video.
Matod niya tataw nga political harassment kini ug wala nay lain pa.
