Nanawagan si Vice President Sara Duterte sa mga Pilipino nga ipakita ang kaisog ug kalig-on nga sama sa gipakita sa mga bayani sa gubat sa nasud, samtang giatubang ang mga hagit karon, isip pagsaulog sa Araw ng Kagitingan.
Sa iyang opisyal nga mensahe karung adlawa Abril 9, gipahinumdoman ni Duterte ang malungtarong kabilin sa mga sundalong Pilipino ug Amerikano nga nakig-away sa Battle of Bataan, ug giawhag ang mga lungsuranon nga dili mohunong bisan pa sa kalisdanan.
Gipasiugda sa Bise Presidente nga ang maong espiritu sa determinasyon ug patriotismo nga gipakita sa panahon sa Ikaduhang Gubat sa Kalibutan kinahanglan magpadayon nga maggiya sa mga Pilipino karon.
Giawhag usab niya ang publiko nga atubangon ang kasamtangang mga isyu uban sa kalig-on ug panaghiusa, samtang nagtinguha sa usa ka lig-on, luwas, ug tinuod nga gawasnon nga Pilipinas.
Gipasidunggan usab ni Duterte ang mga sakripisyo sa mga sundalo nga mibarog sa Bataan,ug iyang gihulagway ang ilang mga binuhatan dili lamang isip usa ka demonstrasyon sa kusog sa militar, kondili usab usa ka lawom nga pagpahayag sa gugma alang sa nasud.
Sa paghisgot sa mga kasamtangang isyu, gipasiugda ni Duterte nga ang tinuod nga kaisog karon makita sa pagpanalipod sa nasudnong soberanya ug sa pagpatuman sa lagda sa balaod.
Nagpasidaan usab siya nga ang bisan unsang pagsulay sa mga langyaw nga institusyon sa pagpanghilabot sa sistema sa hustisya sa nasud usa ka direktang hagit sa kagawasan nga gipakigbisogan sa atong mga bayani.
