CEBU – Giaprobahan sa Regional Tripartite Wages and Productivity Board (RTWPB)-7 ang P31 nga usbaw nga suholan sa tanang minimum wage earners sa tibuok Central Visayas.
Gikompirmar kini sa usa sa labor sector representative sa wage board nga si Joe Tomongha.
Matod ni Tomongha nga ang P31 nga usbaw gikasabotan sa tanang miyembro sa board niadtong Martes, Mayo 24, 2022.
Gilangkuban ang wage board sa regional director sa Department of Labor and Employment (DOLE)-7 isip chairperson, mga regional director sa Department of Trade and Industry (DTI)-7 ug National Economic and Development Authority (NEDA) isip vice-chairpersons, duha ka representante sa employer sector, ug duha ka labor sector representatives.
Gawas niini, gi-aprobahan usab ang P500 nga binuwan nga umento sa suholan sa mga house helper o kasambahay sa rehiyon.
Makadawat na ang mga kasambahay sa rehiyon og minimum nga P5,500 kada buwan gikan sa P5,000.
