CEBU – Giandam sa Cebu City Transportation Office (CCTO) ang pipila sa mga lakang nga alang sa umaabot nga Bar Examinations 2022 nga magsugod ugmang adlawa Miyerkules, Nobyembre 9.
Matud pa ni Raquel Arce, ang hepe sa CCTO, nga traffic rerouting na lang ang ilang ipatuman inay pagpasira sa mga karsada sa mga dapit duol sa University of San Carlos Main (USC Main) ug sa University of Cebu – Banilad Campus (UC-Banilad).
Dugang pa, nga dili na kinahanglan nga sirad-an ang mga karsada sanglit dili na mogawas ang tanang mga barrister sa ilang testing centers sa pagsugod na sa eksaminasyon.
Mopahimangno usab ang CCTO sa mga motorista nga dili magpabuto og busina kon moagi sa mga testing areas.
Dugang pa ni Arce nga labing minos 30 ka traffic enforcers ang idestino sa duha ka testing venues sugod karong Miyerkules aron makatabang sa trapiko sa maong mga dapit.
