Giklaro sa legal counsel ni Bise Presidente Sara Duterte, nga si Atty. Paul Lawrence Lim sa Chua Lim & Associates, nga wala’y espesyal nga pagtratar sa Bise Presidente sa dihang gipailalom siya sa pormal nga proseso sa pag-book sa Quezon City Regional Trial Court.
Gipasabot sa abogado nga ang Bise Presidente nagsumite sa iyang kaugalingong litrato sa korte alang sa gikinahanglang rekord, samtang ang iyang mga fingerprint gikuha sa hustong paagi ug pormal subay sa kasamtangang proseso sa balaod.
Sa samang higayon, pormal nga gikumpirmar ni Lim nga ang warrant of arrest nga gi-isyu batok kang Duterte gi-lift o gi-disaside human niya malampusong gisang-at ang gikinahanglan nga piyansa sa iyang kaso sa grave threats.
Ang pag-atubang sa korte nagsunod sa miaging baruganan sa Bise Presidente nga gipahayag ni Lim, diin giingon nga bisan unsa pa ang isyu sa hurisdiksyon sa kaso, si Duterte walay intensyon nga molikay sa balaod ug magpadayon sa paggamit sa tanan niyang legal nga mga remedyo.
Tungod sa pagsang-at sa piyansa ug pagdeposito sa angay nga kantidad sa korte, ang Bise Presidente temporaryong gibuhian ug gilikayan ang pagkabilanggo samtang ang merito sa iyang kaso nagpadayon sa pagdungog.
Bisan pa sa pagtahod sa proseso sa booking, ang iyang kampo nagpabilin nga komitado sa pakigbisog alang sa mga katungod sa Bise Presidente bahin sa mga isyu sa immunity ug due process sa pagpanubag sa mga impeachable officer.
