CEBU CITY-Nagpabiling wala mapatuman ang gisugyot nga ‘wastewater treatment facility’ sa Pasil Fish Port sa dakbayan sa Sugbo, tulo ka tuig human ang usa ka kontraktor nahatagan sa proyekto.
Hinungdan, nga gisugyot ni Mayor Raymond Alvin Garcia, nga i-rebidding nalang kini, ug ang City Government nagplano nga i-review pag-usab ang gisugyot nga P75 milyones nga wastewater treatment facility project human walay development nga nahimo sa proyekto sukad niadtong Hulyo 2021.
Matod niya nga mas maayo nga i-rebid ang proyekto nga gituyo sa pagproseso sa mga basura nga wala maatiman gikan sa fish port sa dili pa direkta nga i-discharge sa dagat.
Sa niaging ocular inspection sa maong lugar, ang mayor niingon nga iyang naobserbahan nga ang mga fish vendor ug kasikbit nga mga residente molabay ug hugaw nga tubig ngadto sa kasamtangan nga drainage system, nga direktang moagos ngadto sa dagat.
Subay niini, gikwaan og habig sa Bombo Newsteam ang usa sa mga Konsehal sa Dakbayan sa Sugbo nga si Nestor Archival, ug dinhi iyahang gipasabot nga ang budget gituki sa buhatan sa Sangguniang Panlungsod sa Cebu City, apan ang ‘money founding’ niini naggikan sa National pinaagi sa kongreso.
Sa dihang gipangutana sa hinungdan nganung wala pa kini mapatuman hangtud karun, gitubag sa Konsehal nga ‘talinghaga’ usab kini alang kaniya og sa konseho sa Dakbayan, ilabi na nga karon pa kini nakahibalo nga na-award na diay ang mao nga proyekto.
Dugang pa sa konsehal, nga walay makahatag og katin-awan ilabi na nga dili permanente ang mga tawo sa City Engineering, butang nga walay klaro ang documentation niini.
Nasuta, nga niadtong Hulyo 15, 2021, ang proyekto gihatag ngadto sa Rudhil Construction and Enterprises Inc., usa ka Zamboanga del Sur-based contractor, atol sa administrasyon ni anhing mayor Edgardo Labella nga adunay budget nga P74.9 milyones.
Sa sayo pa, ang Department of Veterinary Medicine and Fisheries (DVMF) nakit-an ang mga bakas sa E. coli bacteria ug taas nga fecal coliform sa kadagatan sa South Road Properties, pipila ka kilometro ang gilay-on gikan sa pantalan sa isda, nga adunay peligro sa kahimsog sa mga tawo.
Sa laing bahin, ang City Environment and Natural Resources ug ang Bureau of Fisheries and Aquatic Resources miingon nga ang E. coli bacteria ug taas nga fecal coliform sa lawas sa tubig nagdala usab og peligro sa kinaiyahan, ilabi na sa kinabuhi sa dagat.
