CEBU – Dili angayan nga kabalak-an ang bag-ong gawas nga XBB ug XBC variants sa COVID-19 nga nakasulod sa Pilipinas.
Gipasabot ni Dr. Rene Josef Bullecer, usa ka medical doctor, nga resulta kini sa paningkamot sa virus nga maka-survive hinungdan nga kini mag-usab-usab ug makamugna ug dugang nga mga dagway ug spikes.
Bisan ug dili kini angayan nga kabalak-an, kinahanglan nga hinumdoman nga mao kini ang pinaka-paspas nga variant nga mukatap, ingon man nga kini ang musukol sa immunity sa tawo, diin dili kini mupatuo ug bakuna o booster.
Hinuon, bisan pa man nga ingon niini ka paspas ang maong variants, matud pa, mild lang lang sintomas niini sama na lang sa karat nga tutunlan, hilanat ug pangapoy sa lawas, ingon man nga wala man mudaghan ang ihap sa mga nadala sa tambalanan o naabot sa kritikal nga kondisyon.
Tambag lang ni Bullecer nga padayon nga panalipdan ang ‘vulnerable’ nga sektor sama na lang sa mga edaran ug ang mga adunay ‘comorbidities’ o mga masakiton gumikan kay mao kini sila ang dali nga mataptan sa maong mga naasoy nga COVID-19 variants.
