Gimanduan ni Philippine Coast Guard (PCG) Commandant, CG Admiral Ronnie Gil Gavan ang tanang hingtungdan nga PCG District Commanders sa pagsiguro sa zero maritime casualty atol sa pag-igo sa Bagyong Aghon sa Pilipinas.
Matod ni PCG Spokesperson CG Rear Admiral Armando Balilo, ang ilang mga deployable response groups ug rescue assets sa Visayas ug Mindanao andam nga mosuporta sa gikinahanglang local evacuation ug rescue operations.
Samtang gipasiugda ni Admiral Gavan ang koordinasyon sa ubang mga ahensya sa pagluwas alang sa dinalian nga pagtubag sa mga insidente sa kadagatan.
Gitambagan usab sa PCG ang mga pasahero sa mga marine vessel nga magpabiling magbinantayon ug gipahinumdoman ang mga mananagat nga dili mangisda panahon sa bagyo.
Ang PCG nipagawas usab og advance notices alang sa mga marinero aron masiguro ang ilang kaluwasan.
Sa pagkakaron, padayon nga gimonitor sa ahensya ang gidaghanon sa mga stranded nga pasahero, driver, cargo helper, sa mga pantalan sa Bicol, Eastern Visayas, Central Visayas, ug Northeastern Mindanao.
Ingon man ang mga barko sa dagat sama sa rolling cargo, vessels, ug motorbanca, nga dili makabiyahe tungod sa Bagyong Aghon.
