Patay ang usa ka motorista samtang 13 ka pasahero ang naangol human sa aksidente nga nalambigit ang usa ka bus, tourist van ug motorsiklo sa lungsod sa Alicia sa Probinsya sa Bohol, pasado alas 8:00 sa buntag, Huwebes, Hunyo 25, 2026.
Ang namatay nailhang si Alberto Muring, legal nga edad ug lumolupyo sa Bulawan, Mabini.
Base sa inisyal nga imbestigasyon sa mga sakop sa kapulisan, nagpadulong sa lungsod sa Candijay ang Southern Star Bus nga gimaneho ni Luis Andoy Naquilla, 53 anyos, taga-Calape, sa dihang kalit kining nabanggaan sa usa ka tourist van nga gimaneho ni Lyl Lepetin, 38 anyos, taga-Loon, pag-abot sa usa ka interseksyon nga dalan.
Tungod sa kusog sa pagkabangga, milahus sa pikas linya sa karsada ang bus hinungdan nga nabanggaan niini si Muring, nga naglingkod sa iyang motorsiklo nga nakaparada sa daplin sa kadalanan.
Gideklarar nga dead on the spot ang biktima tungod sa grabeng mga samad nga iyang naangkon.
Samtang naangol usab ang duha ka pasahero sa bus ug 11 ka pasahero sa tourist van nga pulos mga turista. Nasamdan usab ang drayber sa van ug gidala sila sa ospital alang sa tambal ug pag-atiman.
Sa pagkakaron, gikustodiya na sa kapolisan ang drayber sa bus samtang nagpadayon ang imbestigasyon aron matino ang tinuod nga hinungdan sa maong trahedya.
