CEBU CITY-Gitataw ni Majority leader Konsehal Raymund Garcia nga gilihok na karon sa city council ang paghatag og additional 10,000 pesos gawas sa sweldo sa mga medical frontliners niining panahon sa pandemya.
Matud ni Garcia sa dihang nahinabi sa Bombo Radyo Cebu sa tulumanong Zona Libre nga naghuwat nalang sila sa mga lista sa frontliners nga nagtrabaho sa mga tambalanan nga eligible niini gumikan kay wala pa matud pa’y misumiter sa mga si kinsa man ang mamahimong makapahimulos sa maong additional pay.
Apan gipasabot sa konsehal nga kining maong additional pay ang ihatag lamang sa mga medical worker nga nagtrabaho sa covid wing sa mga tambalanan ug ang nag-atiman sa mga covid patients. Ang kadto matud pa’ng mga nagtrabaho sa tambalanan nga wala na-assign sa covid wing ang dili matagaan niini.
‘Hazard pay sa tanod’
Samtang ang hazard pay matud pa sa mga tanod sa matag barangay ang gipasabot sa konsehal nga angayan na usab nga musumiter ang mga kapitan sa lista niini sa city hall aron nga malihok sanglit hangtud niining mga orasa wala matud pay nadawat ang city niining naasoy nga lista.
