Usa ka Ten Wheeler Truck nga nagkarga og mga sako sa semento ang mibangaa sa usa ka banko sa lungsod sa Barili, kasadpang bahin sa Sugbo human kini nawad-an og brake nga midaro sa mga sakyanan.
Atol sa imbestigasyon sa Barili Municipal Police Station nga gikan sa southboud lane ang maong Ten Wheeler Truck nga gi maneho ni Joemarie Delmonte, taga dakbayan sa Victorias, Negros Occidental nga nagkargag semento paingun sa pantalan sa Barangay Tangil, Lungsod sa Dumanjug.
Apan pag abot sa dulhogon nga bahin sa kadalanan sa Sta. Ana, lungsod sa Barili ang maong truck nawalaan og control og nasaghiran niini ang iyang gisundan nga tricycle nga gi maneho ni Edison Caballero, 49, taga Mantalongon, Barili.
Human niya masaghiri ang tricycle, mibangga na usab siya sa nag parking sa kilid sa kalsada nga pickup truck ug wa gyud kini mohunong hangtod nga iyang naigo ang tanke sa tubig.
Nahunong ra kini sa dihang mibangga na siya sa buhatan sa maong banko nga nahimutang sa Barangay Poblacion sa lungsod sa Barili.
Nakaangol kinig lima ka mga tawo nga daling gidala sa tambalanan sa lungsod samtang ang driver sa ten wheeler truck gibalhog karon sa Barili police station ug mag atubang kinig kasong Reckless Imprudence Resulting in Multiple Physical Injury and Damage to Properties.
