CEBU CITY-Moabot sa 100 ka mga uniformed ug non-uniformed personnel gikan sa Cebu City Police Office ang nipaubos sa drug test niadtong Martes, Hunyo 20,2023.
Gibutyag ni Police Colonel Ireneo B. Dalogdog, City Director sa Cebu City Police Office, nga ang maong aktibidad kabahin sa administrative disciplinary machinery o sa Philippine National Police (PNP) internal cleansing program.
Matod ni Dalogdog, tanang 100 ka personnel ang negatibo sa illegal nga drugas.
Kahinumduman nga gipaubos niadtong Mayo 26 sa drug test ang mga personnel sa PNP lakip na ang mga sakop sa Station Drug Enforcement Unit (SDEU) gikan sa Cebu City Police Station 1 hangtod 11 kund diin ang tanan nga mga test migawas nga negatibo.
Apan, atol sa drug test niadtong Abril, duha ka personnel ang nagpositibo. Matud ni Dalogdog nga padayon pa ang imbestigasyon niini apan Absent without leave (AWOL) ang mga nalambigit.
Giseryoso sa kapolisan ang cleansing program ug dili kini mohunong hangtod nga malimpyohan ang CCPO sa mga personahe nga nalambigit sa ilegal nga drugas.
Kung mapamatud-an nga positibo sa paggamit sa droga ang mga nga pulis mosubay sa hustong proseso ug mag-atubang sa kasong administratiba.
