BOGO CITY- Malampusong naluwas sa mga nagkadaiyang sakop sa mga awtoridad ang anaa sa 11 ka mga indibidwal human matikyaob ang ilang gisakyang pumpboat sa kadagatan sa isla sa Capitancillo sa dakbayan sa Bogo sa amihanang Sugbo pasado alas 10 sa buntag niadtong Enero 27, 2025.
Gikatahong gikan ang mga biktima sa Muabog, Tabogon nga nagbakasyon sa isla sa Capitancillo niadtong Dominggo sa hapon apan sa higayong mupauli na kini sa mainland Cebu kay natikyaob ang bangkang gisakyan niini hinungdan sa insidente.
Usa ka Joevenito Monterola nga usa ka mananagat nga taga Bitoon, Tabogon ang nitaho sa mga sakop sa Coast Guard Substation Tabogon aron sa pagpangayo og tabang kay nasayran niini ang pagkulob na sa usa ka bangka sa kadagatan sa amihanang Sugbo.
Daling milusad og search-and-rescue operation ang sakop sa PH Coast Guard nga inubanan pud sa pagrespondi sa mga sakop sa PCG Borbon, MDRRMO Borbon, MDRRMO Tabogon, MDRRMO Sogod, Bantay Dagat Borbon, Bantay Dagat Tabogon, PNP Maritime Group Tabogon, ug usa ka sibilyan nga si Marvin Pestano hinungdan sa pagkaluwas sa mga biktima.
Maayo nalang og naluwas tanan sakay sa maong bangka lakip na ang 4 ka mga bata diin human kini naluwas kay daling gidala sa Juan B. Dosado Memorial Hospital aron sa pagdalit og atensyong medikal ang mga biktima.
Sa pagkakaron, padayon ang gilusad nga imbestigasyon sa mga sakop sa Coast Guard sa maong insidente aron sa pagsuta sa potensyal nga legal liabilities sa tag-iya sa pumpboat ug ang operator niini.
