TALISAY CITY, CEBU-Nakurat ang buhatan sa City of Talisay Traffic Operations Development Authority (CT TODA) human nga girespondihan ang panagdumbol sa usa ka pickup truck ngadto sa auto nga nahitabo sa Uldog Street,Barangay Poblacion Talisay City.
Gumikan kay ilang nadiskobrihan nga gimaniho sa 12 anyos nga batang lalaki ang usa ka pickup truck nga nalambigit sa maong insidente. Matud pa ni Joy Tumulak ang pangu sa CT TODA nga mao kini ang unang higayon nga dunay nalambigit nga bata sukad sa iyang paglingkud isip pangu sa CT TODA.
Sa ilang imbistigasyon nasayran nga duha na kabuwan nga nagmaniho ang bata sa maong sakyanan ug matud pa nga gisugo kini sa iyang inahan harun sa pagpalit ug tubig sa wala pa ang mahitabo ang insidente, buot usab nga kontakon ang ginikanan sa bata apan kay wala kini selpon ug wala kini makahibaw sa number sa iyang ginikanan rason nganong wala pa kini nipatim-aw sa buhatan sa trapiko.
Pagkahuman sa maong insidente gihatod sa driver sa auto ang bata ngadto sa ilang panimalay harun usab makigtabi sa ginikanan niini samtang ang sakyanan anaa sa buhatan sa CT TODA.
