CEBU CITY- Mihugas og tiil sa 12 ka parokyano sa Romano Katolikong Simbahan sa Sugbo si Archbishop Alberto “Abet” Uy atol sa Mass of the Lord’s Last Supper gahapon Huwebes Santo, Abril 2, 2026.
Kini giisip nga paghandum sa buhat ni Hesus ug sa iyang mapaubsanong pag-alagad sa katawhan sa iyang ulahing mga adlaw sa kalibutan.
Matod sa arsobispo, ang napiling dosenang representante nagrepresentar sa mga biktima sa lain-laing katalagman nga miigo sa probinsya.
Lakip niini ang mga survivors sa 6.9-magnitude nga linog niadtong Septiyembre 30, 2025; mga biktima sa Bagyong Tino niadtong Nobyembre 2025; mga apektado sa Binaliw Landfill landslide niadtong Enero 8; mga indibidwal nga nakasinati og personal nga trahedya; ug mga ginikanan nga nawad-an sa anak tungod sa pagkutlo sa kaugalingong kinabuhi niini.
Miluhod ang arsobispo sa Sugbo sa mga biktima samtang iyang gipangayo nga ang tanan magpadayon sa pag-ampo ug pag-alagad sa isigkatawo, susama sa pananglitan ni Hesus, ilabi na karong Kwaresma.
