Nisaka na ngadto sa 10 ang ihap sa mga namatay sa pagkahugno sa usa ka 9-andanang building nga gitukod sa Angeles City, Pampanga human nakarekober ang mga awtoridad og laing patayng lawas niadtong Domingo, Mayo 31.
Diin gisusi pa sa mga awtoridad ang pagkatawo sa biktima.
Ang ikawalo ug ikasiyam nga mga biktima narekober sa managlahing retrieval operations alas 2:51 ug 3:43 sa hapon. Ug laing lalaki nga biktima ang nakuha gikan sa kagun-oban alas 7:42 sa buntag.
Giingon sa mga awtoridad nga walay bisan usa sa tulo ka biktima ang nagdala og bisan unsang identipikasyon sa dihang nakit-an ang ilang mga patayng lawas.
Nagpadayon pa ang retrieval operations gamit ang mga bug-at nga kagamitan ug manual nga pagkalot samtang ang mga rescuer maampingong nag-ila sa ubang posibleng mga biktima.
