12-patay sa dakong sunog sa amihanang-sidlakan sa Algeria

Patay ang labing menos 12 ka tawo samtang 54 pa ang nasamdan sa dakong sunog sa amihanang-sidlakang bahin sa Algeria.

Matud ni Interior Minister Said Sayoud, ang mga namatay gikan sa mga probinsya sa Jijel, Béjaïa, ug Tizi Ouzou.

Mibisita usab si Sayoud sa mga ospital diin gidala ang mga biktima sa sunog.

Moabot sa 154 ka mga sunog ang natala sa nagkalain-laing bahin sa nasud.

Gituohang nakatampo sa pagkaylap sa mga sunog ang grabe nga heatwave nga nasinati sa Algeria ug Tunisia.

Liboan ka mga residente ang gipabakwit gikan sa ilang mga panimalay tungod sa hulga sa mga sunog.

Gipasalig sa gobyerno sa Algeria nga maghatag kini og tabang sa mga residente nga naapektuhan sa mga sunog.