Gipahibalo sa International Organization for Migration (IOM) sa United Nations nga mokabat sa 139 ka tawo, lakip ang 15 ka bata, ang namatay human natikyaob ang usa ka sakayan nga nagdala og kapin sa 300 ka pasahero sa kadagatan duol sa Djibouti.
Nahitabo ang insidente sa Gulf of Aden tali sa gabii sa Huwebes ug sayong bahin sa buntag sa Biyernes samtang naglawig ang sakayan gikan sa Djibouti paingon sa Yemen.
Kapin sa 80 ka tawo ang naluwas sa maong trahedya, ug ang tanan kanila mga lungsoranon sa Ethiopia.
Samtang, nagpadayon ang mga awtoridad sa Djibouti sa pagpangita ug pagluwas sa 84 ka tawo nga gikatahong wala pa makit-i.
Matod sa IOM, ang maong trahedya nagpahinumdom sa grabeng mga peligro nga giatubang sa mga migrante nga nangitag trabaho ug mas luwas nga kinabuhi sa Middle East.
Nagpadayon ang mga rescue team sa pagtabang sa mga naluwas, samtang gipalig-on ang mga lakang aron malikayan ang susamang mga aksidente sa maong ruta.
