Gikataho nga 14 ka tawo ang namatay samtang 30 pa ang naangol human sa dakong aksidente nga naglambigit sa 23 ka sakyanan sa Fujairah, United Arab Emirates (UAE), Huwebes, Nobyembre 12.
Sumala sa UAE Interior Ministry, nawad-an og kontrol ang usa ka drayber sa trak ug nabangga ang laing sakyanan, sa wala pa kini miatras ug miigo sa ubang mga sakyanan nga hinay ang dagan tungod sa trapiko.
Miabot sa 23 ka sakyanan ang nalambigit sa aksidente, lakip ang 18 ka awto ug lima ka trak.
Tungod sa kusog sa impact, nasunog ang trak ug mikaylap ang kalayo ngadto sa ubang mga sakyanan.
Gidala sa mga ospital ang 30 ka naangol, diin 15 kanila ang nakagawas na human matambalan, samtang ang laing 15 nagpabiling nagpaayo.
Samtang, gipahigayon ang DNA testing aron mailhan ang pipila sa mga namatay. Lakip sa mga biktima ang mga taga UAE ug ubang langyaw nga nasud.
Nagpadayon ang imbestigasyon sa mga awtoridad aron matino ang tanang detalye sa maong aksidente.
