CEBU CITY- Gihatagan og full scholarship ang usa ka 15 anyos nga bayani gikan sa lungsod sa Liloan, nga si Jayboy Magdadaro, ni Mabolo Barangay Captain Atty. Daniel Francis Arguedo isip pag-ila sa iyang kabayanihan human niya naluwas ang gibanabanang 50 ka mga tawo taliwala sa kadaot nga gibilin sa Bagyong “Tino” niadtong Nobyembre 4, 2025.
Sumala ni Kapitan Arguedo, gipakita ni Magdadaro ang tinuod nga espiritu sa kabayanihan ug kaluoy sa uban bisan pa sa risgo sa iyang kaugalingong kinabuhi.
Ang maong scholarship moangkon sa tanang gasto sa eskwelahan para sa kurso nga gustong kuhaon ni Magdadaro, ug adunay monthly allowance nga ₱3,000 aron pagsuporta sa iyang pagtuon.
Kahinumdoman nga, sa dihang nagsugod ang walay hunong nga ulan atol sa pagkuso-kuso sa Bagyong Tino, miadto una siya sa Sitio San Roque aron monakwit, apan sa wala damha, ang Villa Lara maoy usa sa labing naapektuhan sa kusog nga bul-og sa tubig.
Walay pagduha-duha, milihok dayon siya. Gikan sa alas 8 sa buntag hangtod alas 3 sa hapon, gamit lang ang salbabida ug gamay nga bangka, gisugat niini ang kusog nga bul-og sa tubig aron maluwas ang mga residente nga sagad sa mga bata, mga mabdos, ug mga tigulang.
Balik-balik niyang gitabok ang naghaguros nga tubig aron madala sila ngadto sa mas luwas nga lugar.
Samtang nagpadayon ang pagluwas, nakita ni Jayboy ang daghang mga lawas nga naanod sa baha, apan wala kini makapugong kaniya sa pagpadayon sa iyang misyon.
Taliwala sa kahadlok ug kakapoy, ang iyang kaisog ug kaluoy nagpatigbabaw.
Human sa iyang bayanihong buhat, daghang mga residente ang misulay sa pagtanyag kaniya og kwarta isip pasalamat, apan matinahuron siyang mibalibad.
