CEBU – Nabalhog karun sa Police Station 1 sa Mandaue City Police Office ang usa ka hepe sa barangay tanod human nga gipasanginlan nga nanglugos ug usa ka 16-anyos nga babaye.
Sa pakighinabi sa Bombo News Team kang Police MSgt. Hannah Milan, sa Police Station 1 Women and Children’s Desk, gibutyag niini nga nagpakitabang kanila ang menor de edad kagahapon sa udto, Hulyo 19, 2022, kauban ang guardian niini, subay sa gihimong pagpanglugos sa suspek.
Gumikan kay kaso nga rape ug menor de edad ang biktima, hayan dali sila nga nakapahigayon ug follow-up operation ug daling gisikop ang suspek sa dihang ilaha kining natultolan.
Sigon pa, nagpakitabang ang biktima sa barangay gumikan kay gidapatan kini sa iyahang kapuyo, hayan gidala kini sa suspek, apan giingong inay nga sa balay sa ginikanan, gi-asuy sa biktima nga gidala kini sa usa ka lodging house.
Sa pagkakarun, gipaabot pa sa kapulisan ang resulta sa ‘pink room’ arun nga masuta kung nahilabtan gayud sa suspek ang biktima.
Samtang, sa habig sa suspek, eksklusibo nga nahinabi sa Bombo News Team, gihimakak niini ang maong pasangil ug giingong igo lang gayud kini nga mitabang sa biktima human nga nangayo ug assistance sa barangay.
Duda pa niini nga mismong ang kapuyo sa naasoy nga menor de edad ang nangusog sa pasangil batok kaniya human nga nasuko nga ilahang gitabangan ang biktima.
Gipadayag sa suspek nga inay ang kapuyo man nga giingong usa ka drug surrenderee ang mapriso ug mapasakaan ug kaso sa pagpanapat sa biktima, giingong siya ang giduot ug gipasangilan nga nanglugos sa menor de edad.//
