17 patay sa sunog sa India

Patay ang 17 ka tawo ug daghan pa ang naangol human nasunog ang usa ka building sa Hyderabad City, habagatang India.

Gidala na sa tambalanan ang mga naangol nga biktima sa sunog nga miulbo duol sa makasaysayanong monumento sa Charminar.

Sumala sa federal minister ug lider sa Bharatiya Janata Party nga si G Kishan Reddy, short circuit ang hinungdan sa sunog.

Basi sa inisyal nga imbestigasyon, mokabat sa 21 ka mga tawo ang anaa sulod sa tulo ka andana nga edipisyo sa dihang nagsugod ang sunog.

Ingon man nga ang miulbog sunog kay milanat og kapin sa usa ka oras una hingpit nga napalong.