CEBU – Nasakmit sa mga polis ang P122.4 milyones nga balor sa ‘shabu’ nga motimbang og 18 kilos atol sa buy-bust operaiton sa Holy Family Road sa Barangay Busay, dakbayan sa Sugbo pasado alas dose sa udto, gahapon Lunes, Oktubre 3, 2022.
Matod sa mga sakop sa Police Drug Enforcement Group Special Operations Unit sa Central Visayas (PDEG-SOU-7) sa Police Regional Office sa Central Visayas ( PRO-7), nga nakaikyas ang tigpayupot og drugas dihang namatngonan niini nga nakig-atbang siya og tinago nga polis.
Dugang pa sa mga sakop sa PDEG-SOU-7 nga human masirad-an ang transaksiyon sa duha ka kilo sa gituohang shabu, naamgohan sa suspek nga nakig-transaksiyon kini sa usa ka polis, dayong talikod ug midagan palayo sa maong polis.
Gigukod siya sa mga polis apan usa ka habal-habal driver ang milabay, nga gibandera sa suspek, miambak sa motorsiklo dayon misibat palayo sa maong dapit, ug dali kining nakaikyas.
Apan ang mga polis niingon nga gibilin sa suspek ang iyang sakyanan nga Toyota Innova diin nakuhaan og usa ka sako nga adunay sulod nga gibana-banang 16 ka kilo sa gituohang shabu.
Gisuta karun kung ang habal-habal driver kauban ba sa suspek o niagi lang ug wala masayod nga kini ang hinungdan nga ang suspek naka-ikyas.
Padayon nga nagpahigayon og follow-up operation ang kapulisan sanglit ila nang nailhan ang supplier nga giingong sakop sa dakong sindikato sa drugas.
Sa bahin sa sakyanan, wala kini plate number ug i-turn over kini sa Land Transportation Office (LTO) aron ilang mailhan ang tag-iya niini.
