CEBU CITY- Hilabihan nga kasubo ang gibati sa pamilya sa 40 anyos nga si Melber Alicabo ug sa iyang igsoon sa amahan nga si Romel Fernandez, 36 anyos, human sila brutal nga gipusil ug gipatay sa ilang mga silingan nga giila nga sila si alyas Jo-jo ug sa iyang pag-umangkon nga si alyas Darwin, niadtong buntag sa Disyembre 25 sa ilang pinuy-anan sa Sitio Barawan, Sawang Calero, Dakbayan sa Sugbo.
Sumala sa inahan sa mga biktima nga si Merlinda Fernandez, miabot si Jo-jo sa ilang balay tali sa alas 7:00 ug alas 8:00 sa buntag aron mangita kang Melber. Paglabay sa pipila ka gutlo, nakadungog siya og buto sa armas ug nadiskubrehan nga si Melber gipusil sa receiving area sa ilang balay.
Human makadungog og buto sa armas, midali pagkanaog si Romel ug nakita niya si Melber nga nagdugo. Misulay si Romel sa pagpakig-alayon kang Jo-jo, apan bisan pa sa iyang paningkamot, napusilan usab siya, nga nakaangkon og makamatay nga samad pinusilan sa nawong.
Gidala dayon si Romel sa ospital apan gideklarar nga patay na.
Atol sa insidente, ang mga anak ug pag-umangkon nila ni Melber ug Romel gikataho nga natulog sulod sa balay. Pagkadungog nila sa mga buto sa pusil, gitrangkahan nila ang ilang mga kwarto ug naghulat og kadiyot sa dili pa mogawas.
Si Maureen, ang kapikas ni Romel, nagpahayag og lawom nga trauma human nakasaksi sa insidente, labi na sa iyang 10 anyos nga anak nga babaye.
Ang mga patayng lawas nila ni Melber ug Romel anaa karon sa punerarya, naghulat sa autopsy.
Samtang, ang suspek nga si Jo-jo anaa na karon sa kustodiya sa pulisya sa Cebu City Police Office, nga nag-atubang og duha ka ihap sa pagpatay ubos sa Article 248 sa Revised Penal Code, ingon man mga kaso sa Illegal Possession of Firearms and Ammunition ubos sa Republic Act 10591.
Sapagkakaron, padayung gawasnon si alyas Darwin, samtang padayon nga nagpahigayon og hot pursuit operation ang mga sakop sa kapulisan.
Gihimug-atan usab ni PCOL George Ylanan City Director, Cebu City Police Office nga aduna gayuy mga isolated nga mga kaso, nga dili malikayan ang krimen apan gipaningkamuta sa dakbayan nga makunhoran gayud kini
