CEBU – Patay ang usa ka 20-anyos nga lalaki human nga nalumos sa Circa La Playa Resort sa Barangay Tungkil, lungsod sa Minglanilla.
Giila ang biktima nga si Claire Remocaldo, residente sa Barangay Bolinawan, dakbayan sa Carcar.
Sa nasayran, giingong kauban sa biktima ang iyahang mga ka-trabaho sa naasoy nga resort arun nga ipahigayon ang ilahang team building sa dihang nahitabo ang insidente.
Makita sa CCTV footage sa maong resort nga mi-ambak ang biktima sa swimming pool nga gibana-banang anaa sa 6-8ft. ang gilagmon, apan kalit na lang kining nagkapa-kapa.
Basi sa video uploader nga si RJ Vicada Bacalso, dul-an sa 30 minutos na nga nalumos ang biktima, una nga nakuha gikan sa pool.
Gisuwayan pa kini pag-revive pinaagi sa ‘cardiopulmonary resuscitation’ o CPR, una nga mi-abot ang ambulansya, apan wala na gayud maka-survive pa ang biktima.
Sa pagkakarun, gikab-ot pa sa Bombo News Team ang habig sa management sa resort, ingon man ang habig usab sa pamilya sa biktima.
