CEBU CITY – Mukabat sa 2,000 ka mga police ang idugang sa pwersa sa Cebu City Police Office (CCPO) alang sa pagbantay sa seguridad sa umaabot nga Sinulog Festival 2020.
Gibutyag ni CCPO OIC Police Colonel Engelbert Soriano nga gikan sa nagkadaiyang provincial ug city police office sa Region 7 ang nahisgutang mga police nga ipang-augment dinhi sa dakbayan sa Sugbo alang sa maong kalihokan.
Matud ni Colonel Soriano nga gawas sa maong mga pulis adunay daghang mga force multiplier ang mu abag usab sa kapulisan, susama na lang sa mga tinun-an sa nagkadaiyang tunghaan nga nagkuha ug ROTC ingon man ang mga sakop sa Boy Scout of the Philippines (BSP).
Subay niini, gisiguro ni Soriano nga paningkamotan sa kapulisan nga protektaran ang katawhan sa umaabot nga kapiyestahan.
Gihangyo lang usab niini ang publiko nga magbinantayon sa palibot ug dili magduha-duha sa pag-report sa kapulisan kung ugaling adunay tawo nga kadudahan ang lihok.
