CENTRAL VISAYAS-Mikabat sa 2,448 ka mga panimalay sa Central Visayas ang natangtang sa listahan sa Pantawid Pamilyang Pilipino Program (4Ps) sa Department of Social Welfare and Development.
Matod ni Kerwin Macopia ang Pantawid Information Officer sa DSWD-7 ngagihimo ang delisting pinaagi sa DSWD-7’s grievance redress system.
Gikan sa Enero hangtod Hunyo 13, 2023, si Macopia miingon nga ang ahensya nag-delist sa 2,064 ka 4Ps household beneficiaries human sila mipirma ug waiver samtang 361 ang gikonsiderar nga disqualified.
Laing 23 ka mga panimalay ang gi-delist tungod sa dili maayong pamatasan.
Gidugang ni Macopia nga ang uban nadiskwalipika human mitumaw ang mga reklamo nga ang usa ka benepisyaryo sa panimalay gilantaw nga dili pobre base sa aktuwal nga kahimtang sa wala pa ang pagkaladlad sa programa.
Giklaro sa ahensya nga nakadawat usab og mga reklamo batok sa 50 ka mga benepisyaryo tungod sa dili maayong pamatasan human giprenda ang ilang 4Ps cash cards o ATM.
Sa 50 ka mga benepisyaryo , 46 ang nakahimo sa paglapas sa unang higayon, samtang 4 ang mihimo niini sa ikaduhang higayon.
Gawas niini,gibutyag sa Regional Development Council (RDC)nga nirekomendar usab sa ilang central office nga tun-an ang remedial legislation o executive measure alang sa silot sa mga indibidwal ug korporasyon nga modawat sa 4Ps cash cards.
Apan, pipila ka mga local government units (LGUs) sa Sugbo ang nipasar na og ordinansa nga nagpahamtang og silot niadtong modawat sa 4Ps cash cards isip loan collaterals.
Lakip niini ang Bogo City, Cordova, ug Santander.
Dugang pa nga pipila niini nga mga LGU nagpahamtang og multa ug pagkapriso og unom ka buwan batok niadtong makalapas sa ordinansa ug bisan sa pagbakwi sa ilang business permit.
Niadtong 2022, gi-delist usab sa DSWD-7 ang 23 ka pantawid household beneficiaries tungod sa nasakpan nga nagprenda sa ilang mga cash card.
