Gidakop ang tulo ka opisyal sa North Korea human ang gibanabanang 5,000 ka toneladang warship kay aksidenteng nalansad gikan sa Chongjin niadtong Miyerkules.
Mao kini ang gitaho sa Korean Central News Agency (KCNA).
Diin gitawag ni North Korean leader Kim Jong Un ang insidente nga usa ka “criminal act” tungod sa pagkapakyas, human ang mga bahin sa ilawom sa barko nadugmok.
Giila ang mga dinakpan nga chief engineer sa shipyard, head sa hull construction workshop, ug ang deputy manager sa administrative affairs.
Gikataho usab nga ang manager sa shipyard nga si Hong Kil Ho nga gipatawag sa mga awtoridad alang sa imbestigasyon.
Gikumpirmar sa militar sa South Korea ug paniktik sa US nga napakyas ang “pagsulay sa paglansad” sa barko, hinungdan nga nalunod kini.
Apan giinsister sa KCNA nga dili grabe ang kadaot, ug walay buslot sa ilawom sa barko base sa gihimong inspeksyon.
Gitandi sa South Korea ang bag-ong warship sa 5,000-toneladang destroyer-class nga “Choe Hyon,” nga unang gipakita sa Pyongyang sa miaging bulan.
Nagduda usab ang Seoul nga ang Russia mahimong mitabang sa paghimo sa barko baylo sa pagpadala sa mga tropa sa North Korea ngadto sa Ukraine.
