Nakab-ot sa mga residente sa Minglanilla ang usa ka mahinungdanong kadaugan sa ilang pakigbatok batok sa quarrying operations nga giingong hinungdan sa mga liki sa yuta sa Sitio Napo, Barangay Guindarohan.
Gipagawas sa Regional Trial Court (RTC) Branch 76 sa Naga City ang usa ka ex-parte Temporary Environmental Protection Order (TEPO) batok sa JOMARA Konstruckt ug JOMARA Agri Foods, nga nagmando sa maong mga kompanya nga mohunong dayon ug dili na magpadayon sa ilang quarrying operations sa maong lugar.
Nasang-at ang kaso tungod sa nagkadaghang kabalaka sa mga residente human makita ang mga liki sa yuta, nga nagdala og risgo sa landslide ug nagbutang sa peligro sa mga pamilya nga nagpuyo sa Sitio Napo.
Ang petisyon naggikan sa usa ka citizen suit nga gisang-at sa mga concerned residents sa Minglanilla, alang sa ilang kaugalingon ug sa mga henerasyon nga umaabot pa.
Sa order, gi-emphasize sa korte ang kadinalian sa sitwasyon, nga nag-ingon nga kung dili ihatag ang TEPO, ang mga petitioner mahimong makaangkon og “grave injustice ug irreparable injury.” Gipasabot usab nga ang padayon nga excavation ug quarrying mahimong makapasamot pa sa kahimtang sa yuta sa lugar.
Ang korte kombinsido kaayo nga ang presensya sa mga pamilya sa maong lugar samtang nagpadayon ang excavation ug quarrying nagmugna og hulga sa kahimsog ug kinabuhi. Nagkanayon ang korte nga ang apektadong mga pamilya, apil na ang mga bata ug tigulang, anaa sa dako nga risgo sa kamatayon tungod sa taas nga posibilidad sa landslide sa lugar.
Pinaagi sa TEPO, gimandoan ang JOMARA Konstruckt ug JOMARA Agri Foods nga undangon ang tanang quarrying, excavation, ug pagkuha sa yuta sa ilang property sa Guindarohan.
Gidid-an usab sila sa land clearing, pagputol og kahoy, ug pag-operate sa motor pool facilities ug heavy equipment nga mahimong makadaot sa kalig-on sa yuta ug makapahinungod og ground vibration.
Gikatakda ang hearing sa kaso karong Mayo 6 atubangan ni Presiding Judge Dennis C. Larrobis, diin hisgutan pa ang dugang ebidensya ug mga argumento aron matino ang sunod nga lakang.
