CEBU CITY-Gipaubos na sa ‘inquest proceeding’ ang tulo ka suspetsado nga nanulis sa negosyante sa Brgy Binaliw, dakbayan sa Sugbo sa nakalabay nga adlaw nga Lunes, Disyembre 4, 2023.
Kini ubos sa pagdumala ni Police Major Janelito Marquez ug Police Lieutenant Colonel Conrado Manatad, nga mao ang deputy city director for administration sa Cebu City Police Office (CCPO).
Nadakpan ang mga tulisan nga giilang sila si Jerry Apa, Jay Palermo ug Leopoldo Jamolin, mga taga dakbayan sa Lapu-Lapu sa pagpangu ni Police Lt. Col. Conrado Manatad sa Cebu City Police Office ug sa Talamban Police station didto sa Soong Lapu-Lapu City.
Kahinumduman na ang biktima negosyante ug buy and sell ug sakyanan nga taga General Santos City.
Usa sa mitulis kaila ra ug suod sa biktima didto sa Gensan nga maoy nag-drive sa sakyanan sa mga biktima.
Mukabat sa P900,000 ang kantidad sa mga kabtangan ug kwarta nga natulis gikan sa mga biktima diin ang kwarta anaa sa kapin P400,000.
Apan ang nakuha ug balik sa mga pulis mao lang ang usa ka kwentas, duha ka bracelet, duha ka singsing nga unta tulo ang nawagtang.
Dugang niini, ang kwarta nga narekober anaa nalang sa P179,000.
