Naugdaw ang usa ka junk shop sa Barangay Dobdob, sa bukirang bahin sa lungsod sa Badian, kagahapong adlawa, Dominggo pasado alas 12:45 sa udto
Nakadawat og tawag ang Badian Municipal Police Station gikan sa mga residente nga nagreport sa sunog sa junk shop nga gipanag-iya ni Samuel Cui Mabuting, 56, residente sa Barangay Dagatan, Badian.
Dali nga nakig-alayon ang mga kapulisan sa mga sakop Bureau of Fire Protection aron magpadala og tabang sa pagpalong sa kalayo, apan pag-abut sa lugar naglisod na ang mga volunteers sa pagpalong sa sunog.
Samtang, usa ka fire truck gikan sa lungsod sa Badian ang unang niresponde sa lugar apan kalit kining nalimbuwad hinungdan nga wala makadiskarga og tubig, ug nakaangol sa mga sakay niini.
Sumala sa mga saksi, ang sunog posibleng nagsugod sa uga nga sagbot sa daplin sa dalan duol sa junk shop hinungdan nga dali kini nga mikatap ang kalayo, tungod sa mga sulod sa junk shop, nga sagad gilangkoban og mga plastik ug uban pang dali masunog nga mga materyales.
Nakita sa imbestigasyon nga usa ka upos sa sigarilyo ang gituohang gigikanan niini, nga nagtukmod sa mga awtoridad sa pagtuo nga ang kainit lagmit mao ang nakaingon sa pagsilaob sa uga nga sagbot, nga mikatap dayon sa junk shop.
Gibana-bana nga moabot sa ₱10,000 ang danyos. Samtang, wala usab gitaho nga namatay gawas sa mga naangol nga sakay sa nalimbuwad nga fire truck.
