CEBU CITY- Giklaro sa Cebu City Police Office (CCPO) nga dili tinuod ang naglibot nga report sa social media mahitungod sa giingong robbery incident sa Barangay Buhisan, Cebu City, human sa gihimong beripikasyon ug imbestigasyon.
Matud sa CCPO, gilayon nila nga gi-validate ang impormasyon human mikaylap ang usa ka video nga nag-ingon nga adunay nahitabong tulis sa 17th Street, Barangay Nazareth ug Tomas Saco 1st Street, nga giingong sakop sa Barangay Buhisan.
Apan sa imbestigasyon sa kapulisan, nasuta nga walay maong mga street address sa Barangay Buhisan o bisan sa kasikbit nga mga lugar sa Cebu City. Gikompirmar usab sa mga opisyal sa barangay nga wala sila kaila o rekord sa maong mga lokasyon.
Dugang pa sa CCPO, walay narekord nga insidente sa pagpangawat nga motakdo sa giingong detalye, lakip na sa oras nga alas 2:58 sa kadlawon niadtong Abril 23, 2026.
Sa dugang beripikasyon, lakip ang pag-analisar sa video ug mga komento online, nakita sa kapulisan nga posibleng sa Cagayan de Oro nahitabo ang maong insidente, diin anaa gyud ang gihisgotang mga dalan.
Busa, gipatin-aw sa CCPO nga sayop ug dili tinuod nga sa Barangay Buhisan, Cebu City nahitabo ang giingong tulis.
Giawhag usab sa kapulisan ang publiko nga magmatngon ug responsable sa pagpaambit sa impormasyon sa social media, ug siguruhong beripikado kini gikan sa opisyal ug kasaligan nga tinubdan aron malikayan ang pagkatap sa sayop nga balita.
