CENTRAL VISAYAS-Gikompirmar sa Criminal Investigation and Detection Group in Central Visayas (CIDG-7) nga nasikop sa ilang mga personnel sa Negros Oriental ang tulo ka mga lalaki duolan sa tungang gabii niadtong Miyerkules, Hulyo 12, tungod sa giingong pag-apil sa online sabong, nga gitawag usab og e-sabong.
Giila ang mga suspek nga sila si Alfredo Paculares Requilme, Christopher Iyan Calumba Geonson, ug bettor nga gihinganlan og Godofredo Vergara Fuentes Jr.
Ang tulo ka mga lalaki nasikop mga alas 11:40 sa gabii niadtong Miyerkules sa Brgy. Poblacion, Guihulngan City sa Negros Oriental diin ang kapulisan niingon nga nasakpan sila sa akto nga nag-apil sa online sabong.
Kung diin ang mga raiding team gilangkuban sa CIDG-Negros Oriental, 2nd Provincial Mobile Force Company, Negros Oriental Provincial Police Office, ug mga opisyal sa Guihulngan City Police Station.
Gikompiskar sa kapulisan ang daghang gamit sa sugal gikan sa grupo, lakip ang usa ka laptop nga gigamit isip streaming device alang sa online cockfight nga gisibya pinaagi sa pitblade999.live.
Nasakmit usab nila ang P2,615 nga cash nga gituohang bet money.
Base sa report sa CIDG-7, nakadawat sila og impormasyon nga duha sa mga suspek nga sila si Requilme ug Geonson ang nalambigit sa online sabong activities.
