Cebu City- Mukabat ngadto sa kapin 5 milyones ka pesos nga balor sa iligal nga drugas ang nasakmit sa mga kapulisan sa Waterfront Police station sa duha ka managlahing buybust operation ganihang kaadlawon.
Una nga nasikop mao sila si John Michael Burgas, 29 anyos , taga sitio Kamagong barangay Lahug ug Bryan Antolihao, 34 anyos residente sa Brgy Budlaan dakbayan sa Sugbo. Ang maong operasyon ang gipahigayon sa 13th Avenue , Brgy Tejero diin nakuha gikan sa mga dinakpan ang 275 gramos nga shabu nga gibana bana nga mukantidad og P 3,245,000.
Samtang, nasikop usab sa laing buy bust operation sa MJ Cuenco Avenue, duol sa Museo Sugbo, Brgy Tejero si Johny Boy Augusto alyas Janjan, 29 anyos ug residente sa sitio Mahusay, Brgy Subangdako dakbayan sa Mandaue. Nakuha gikan sa subject ang 175 gramos sa shabu nga dunay DDB value nga mukabat sa 2,065,000 pesos.
Nagtingkagol na karon ang mga dinakpan sa waterfront police station lock up cell samtang padayon nga gisuta kung asa gayud gikan ang ilang supply sa shbau dinhi sa dakbayan sa Sugbo.
