Gilauman sa Department of Tourism (DOT) nga dul-an sa 30 milyones ka mga Filipino ug langyaw nga turista ang mobisita sa nasod sa mga sikat nga tourist destination atol sa umaabot nga Semana Santa sunod semana.
Sa usa ka pamahayag, giila sa ahensya ang posibleng mga top destination karong tuiga diin nag-una ang Cebu, Bohol, Boracay, Palawan, Siargao, Baguio, Batangas, Ilocos Norte, Ilocos Sur, Pampanga, Pangasinan ug Puerto Galera.
Nakita usab sa departamento nga mas daghang turista ang mobisita sa Camiguin, Siquijor, Cagayan de Oro, Davao ug Sarangani.
Samtang, sa Manila, diin nahimutang ang makasaysayanong walled city sa Intramuros, diin gilauman nga 2.4 milyones ka mga turista ang matala atol sa semana santa.
Tungod sa gipaabot nga taas nga ihap sa mga turista nga mobisita sa nasud, gidasig sila ni Tourism Secretary Christina Frasco nga magpa-book sa DOT-accredited nga mga hotel alang sa luwas ug komportable nga bakasyon o pagpabilin sa nasud.
Gi-activate usab sa ahensya ang ilang regional operations center aron mamonitor ang mga destinasyon sa turismo sa nasud.
Ang mga turista nga nagkinahanglan og tabang mahimong motawag sa DOT Tourist Assistance Call Center sa 151-TOUR (151-8687), o mobile number 0954-253-3215. Ang call center naglihok 24/7 ug naghatag suporta sa daghang pinulongan lakip ang Korean ug Mandarin.
