Nagpahigayon na ang National Bureau of Investigation (NBI) og imbestigasyon sa mga gibutyag ni Ramil Madriaga bahin sa giingong plano sa pagpatay kang Presidente Ferdinand Marcos Jr.
Kahinumduman nga gibutyag ni Madriaga nga si kanhi Presidente Rodrigo Duterte giingong nagplano og pagpatay ug kudeta batok kang Pres. Marcos kung dili siya mokanaog katungdanan sa 2025.
Diin ang kontrobersyal nga pahayag giingon sa supplemental affidavit ni Madriaga nga gisumiter sa House Justice Committee nga nagpahigayon sa impeachment hearing batok kang VP Sara.
Sumala ni NBI Director Atty. Melvin Matibag, ang opisina nag-imbestiga na niini, ug gusto nga imbestigahan ang kinatibuk-ang alegasyon.
Bisan ang miaging pahayag ni Davao City Mayor Baste Duterte nga ‘gusto lang nila ang ulo ni Marcos’ kabahin usab sa nagpadayon nga imbestigasyon.
Kini nga kontrobersyal nga pahayag gihimo usab ni Baste atol sa paglusad sa Reform Alliance for Good Governance and Accountability (RAGE Coalition) sa San Juan City, pipila ka adlaw ang milabay.
Sumala sa hepe sa NBI, ang bureau mopagawas unya og memorandum kabahin sa maong imbestigasyon.
Giangkon usab sa abogado nga dili kini yano nga mga pahayag tungod kay pareho kining gitumong sa presidente sa nasud.
