Napaslak sa prisohan ang 37-anyos nga babaye sa Brazil nga giilang si Amanda Maria Souza de Oliveira ug nag-atubang og mga kasong fraud ug identity theft human nagpakaaron-ingon nga 12-anyos nga bata sulod sa kapin usa ka tuig aron magpaampon sa usa ka pamilya.
Nagsugod ang iyang modus sa Joinville pinaagi sa pagpaila sa usa ka pastor nga siya si “Gabriela” nga nikalas gikan sa abusadong pamilya, hangtod nga gipaila-ila siya sa usa ka pamilyang misagop ug miatiman kaniya.
Aron mapadayon ang iyang pagpamakak, niinom si Amanda ug gatas gamit ang tsupon, naggamit og pacifier, niusab sa iyang tingog, ug nag-imbento nga giabuso ug gi-injeksyunan og hormones hinungdan nga hamtong ang iyang panagway.
Apan, walay aso nga makumkom, nabisto kini sa dihang usa ka kabanay ang nagduda ug nag-report sa pulisya, diin nasayran nga usa ka “repeat offender” si Amanda nga giingong mitulon og 100 ka dagom sa iyang lawas kaniadto sa laing bahin sa lungsod aron lamang magpakaaron-ingnon nga biktima sa kulam.
