BOLJOON, CEBU-Human sa malampusong pagkauli sa 4 ka mga Boljoon Pulpit Panels sulod sa pipila ka dekadang pagkawala niini sa orihinal nga simbahan sa Nuestra Señora del Patrocinio de Maria Santisima Parish Church sa habagatang Sugbo, tinguha karon sa kadagkuan sa Archdiocese of Cebu ug Cebu Provincial Government ang pagpanumbalik sa ika-6 nga panid pulpito ug uban pang nakawat nga mga butang sa simbahan.
Kini ang gipamahayag sa mga kadagkuan sa Archdiocese ug kagamhanang lalawigan kagahapong adlawa sa Biyernes, Marso 21 atol sa Pontifical Mass sa Boljoon Church sa public unveiling niini sa pagtaod pagbalik sa mga naasoy nga panid pulpito.
Gipangulohan mismo ni Archbishop Jose Palma ang maong misa nga giduyugan sa mga opisyales sa kagamhanang lalawigan sama nila Provincial Governor Gwendolyn Garcia, 2nd District Representative Edsel Galeos, National Museum of the Philippines Director-General Jeremy Barns, Boljoon Municipal Mayor Joie Genesse Derama ug uban pa.
Gani sa iyang wali sa maong misa, gipasalamatan ni Palma ang kagamhanang lalawigan sa tinguha niini sa pagpabalik sa mga religious artifacts nga nagtimaan sa kadaugan sa katawhang katoliko sa Sugbo.
Apan bisan paman niini, padayon ang panawagan sa mga opisyale aron sa hinggpit nga makumpleto ang maong panid pulpito sa simbahan sa lungsod sa Boljoon.
Lakip sa mga panawagan niini kay ang uban pang bililhon nga mga religious artifacts nga pipila na sab ka katuigan nga nawal tungod sa gituohang gikawat kini.
