CEBU – Halos dili na ma-ilhan ang upat ka mga pasahero nga sakay sa usa ka Van-for-Hire human niini nga gika-bangga ang Ceres bus sa Sitio Ipil-Ipil, Barangay Estaca, lungsod sa Compostela, Cebu.
Giila ang mga biktima nga sila si Gil Dyrol Preciados, gibana-banang anaa sa 40 anyos ang pangedaron, usa ka seaman; Mark Abraham Villanca, 37 anyos, usa ka Overseas Filipino Worker, samtang padayon pa nga gisuta sa kapulisan ang ‘identity’ sa duha pa ka mga biktima.
Samtang, anaa usab sa tambalanan ang mga samdan nga pasahero lakip na ang drayber sa Ceres bus nga si Jerry Lubon, 32 anyos, ingon man nga kritikal ang kahimtang sa drayber sa V-Hire nga si Patrick Tolo, 20 anyos.
Basi sa inisyal nga imbestigasyon, gisaysay ni Police Captain Vincent Zozobrado, ang hepe sa Compostela PNP, nga pa-southbound ang V-Hire, samtang pa-northbound usab ang nahisgutang bus.
Matud pa nga nag-counterflow ang V-Hire ug kusog ang padagan niini hinungdan nga mibangga kini sa gikasugat nga bus.
Gumikan sa kusog nga impact, na-ukab ang V-Hire kung diin ang front seat ug passenger seat na lang ang nahibilin.
Sa pagkakarun, nagpadayon ang follow up investigation sa nahisgutang insidente ug kaso nga reckless imprudence resulting to multiple homicide and physical injury ug damage to property, ang naka-andam nga ipasaka sa kapulisan.
