CENTRAL VISAYAS-Mokabat sa 55,000 ka mga senior citizens sa Central Visayas ang malaumon nga makaangkon og slot sa social pension program sa Department of Social Welfare and Development (DSWD) aron makaapil sila sa programa ug makasugod na sa pagdawat sa binuwan nga pension nga P500.
Gibutyag ni nga Daisy Lor, nga mao ang pangu sa social pension sa DSWD 7 nga ang kuwarta ihatag kaduha sa usa ka tuig o kausa matag semester.
Apan iyang giklaro nga ang mga kabus nga senior citizens lamang nga walay pension gikan sa mga institusyon sa gobyerno sama sa Social Security System (SSS) ug Government Service Insurance System (GSIS), ingon man kadtong walay trabaho ug walay mga anak nga makasuporta kanila ang mamahimong makadawat sa social pension program gumikan kay limitado ang ilang pundo.
Isip kabahin sa programa, una nang gitahasan ang mga local government units sa pag-ila sa mga kabus nga senior citizens sa ilang tagsa-tagsa ka lugar sa rehiyon 7.
Sa pagkakaron, adunay 299,737 ka social pensioners sa Central Visayas.
Subay niini, ang DSWD 7 nanghinaot nga ang ilang nag-unang buhatan maghimo ug dugang mga pag-abli aron ilahang ma-accomodate ang mas daghang mga tigulang nga nanginahanglan.
