CEBU CITY-Gi-aprobaran na sa konseho ang resolusyon nga gipasar ni Cebu City Councilor Alvin Dizon kabahin sa P-5K financial assistance alang sa mga sidewalk vendors nga apektado sa clearing operation.
Gibutyag ni Konsehal Alvin Dizon nga gi-konsiderar nga kalamidad ang nahitabo karon sa mga vendors nga matud pa usa ka “man-made calamity”.
Sa pagkakaron gitan-aw pa sa executive department og asa magkuha og budget para niini ingon man ang pagbuhat usab ug guidelines sa pagdawat niining financial assistance.
Usa sa gitan-aw nga guidelines kung mahatagan ba pag-apil ang mga vendors nga dili residente sa dakbayan. Apan gi-asoy ni Dizon nga walay angay pilion sa paghatag sa maong financial assitance basta apektado sa clearing operation gumikan kay matud pa sa konsehal nga nahimo gani sa Cebu City ang pagtabang sa Mindanao sa mga apektado sa linog, hayan angay usab tabangan ang bisan pa ug dili taga dakbayan sa Sugbo.
Malipayon usab ang konsehal nga nagkahiusa ang konseho kabahin sa panawagan sa mga vendors.
‘Bahala ug dili kadawat’
Bahala ug di matud pa mahatagan ug P5000 nga financial assistance basta makabalik lang sa ilang mga tagsa-tagsa ka mga orihinal nga pwesto ang mga vendors.
Kini ang gibutyag ni Wilma Cabo ang Spokesperson sa Barug Vendor. Matud niini nga atol sa gipahigayon nga session sa Cebu City hall sa milabay nga adlaw nipadangat na usab sila sa ilang mga hangyo ngadto sa konseho.
Mapasalamaton hinoon si Cabo ngadto ni Konsehal Alvin Dizon kinsang mao usab ang nangu aron mapaabot ang ilang mga hangyo sa konseho.
Sa gipahigayon nga session matud pa pahuwaton lang usa sila kung kanus-a sila makabalik sa ilang mga pwesto sanglit padayon pa kining gi planohan karon sa Cebu City government.
Wala pa usab madawat nila ang P5000 nga gipanghatag gikan ni Senador Bong Go gumikan kay naghatag pa sila sa pangan sa mga vendors nga apektado sa clearing operation ingon man ang sa DOLE nga tag P20,000 matag-usa.
Nanghinaot nalang kini nga duna nay klaro nga petsa kung kanus-a sila makabalik ug di lang puro saad-saad.(Lahvi Quiñones)
