LAPU-LAPU CITY, CEBU- Girelibohan ang unom ka pulis sa Police Station 4 sa Lapu-Lapu City Police Office (LCPO) human sa giingong pag-dagmal sa 20-anyos nga Criminology student.
Matod ni Police Lieutenant Colonel Christian Torres, ang tigpamaba sa LCPO, nga ang na-narelibo kay mao sila si Police Major Michael Gingoyon, hepe sa Police Station 4; ang chief ng clerk; ang investigator on duty; ang desk officer nga naka-duty, ug duha ka intel operatives.
Nasayran nga gibutang sa floating status ang maong mga police personnel samtang gidis-armahan ang duha ka intel operatives ug gidid-an sa paggawas sa perimeter sa ilang headquarters.
Sa pakighinabi sa Bombo Radyo Cebu kang Torres, gisaysay niini nga gibutang usa kini sa holding area arun malikayan nga malangan o masamok ang gihimo nga imbestigasyon arun masayran gayud ang tinuod nga nahitabo sa insidente.
Subay niini, labing dugay usa ka semana nga mogawas ang gihimo nga imbistigasyon ug makagawas na usab ang mga gihuptan nga mga otoridad nga nalambigit sa maong insidente.
Sa pagkakaron, gisusi na sa mga kapulisan ang affidavit nga gisang-at sa tag-iya sa balay kinsang giingong gikawatan.
Matud pa nga walay namatikdan ang tag-iya nga adunay timailhan nga gimaltrato ang batan-on sa dihang giingong gipasaka kini sa 2nd floor atol sa ilang pagpa-blotter niadtong higayona.
Ingon man nga gipangayuan usab sa kapulisan ang pamilya sa batan-on og resulta o medical certificate nga nagpamatuod nga na-admit kini ug masuta kung adunay laing bun-og sa iyang lawas.
