Patay ang 6 ka tawo samtang labing menos 11 ang nakaangkon og samad pinusilan human sa pagpauwan og bala sa mga armadong Palestinian sa usa ka hunonganan sa bus sa amihanang Jerusalem, adlaw nga Lunes, Setyembre 8.
Mao kini ang gikumpirmar sa mga otoridad sa naasoy nga nasud, ug lakip sa nasamdan kay usa ka mabdos nga babaye.
Gidugang usab sa mga sakop sa kapulisan nga gawas sa mga sibilyan nga nakabsan kay adunay duha ka mga armado usab ang namatay.
Gikanayon ni Israeli emergency service Magen David Adom nga dakong posibilidad nga madugangan pa ang ihap sa namatay hilabi na nga adunay gikataho nga anaa sa talandugon nga kahimtang.
Madungog ug makita sa mga video nga mikatap ang singgit ug kahadlok sa mga tawo nga nanagan aron mahilayo sa kagubot nga nitumaw sa ilang lugar.
