Gipahibalo sa interior minister sa France nga 70,000 ka mga pulis ang ipakatap sa tibuok nasud isip pagpangandam alang sa mga protesta nga gikatakda karong Sabado, nga dungan sa pagsaulog sa Halloween.
Matod ni Interior Minister Laurent Nunez, mas pahugtan pa ang mga lakang sa seguridad, lakip na ang paggamit og mga armored vehicle ug water cannon.
Kahinumdoman, nga mikuyanap ang mga protesta sa nagkalain-laing bahin sa France tungod sa pagsaka sa presyo sa mga palaliton ug sa nagkataas nga gasto sa panginabuhi—mga sitwasyon nga misangpot usab sa kaylap nga pagpangawat ug kagubot sa nagkalain-laing mga lugar nga komersyal.
Moabot sa gibana-bana nga 2,700 ka mga tawo ang gidakop atol sa nangaging mga demonstrasyon. Samtang, nagpagawas og pasidaan si Nunez ngadto sa mga nagplano nga moapil sa mga protesta: ang bisan kinsa nga mosulay sa paggamit sa Halloween isip pasangil aron itago ang ilang mga nawong sa publiko, mag-atubang og mga sangputanan.
Gipadayag usab sa interior minister nga bisan pa man og gitugotan ang mga demonstrasyon, dili kini mahimong ipahigayon sa mga “city centers” diin mahimo kining hinungdan sa dakong kagubot.
Ang “Yellow Vest” movement gikatakdang magpahigayon sa ilang ikatulo nga hugna sa mga protesta karong Halloween, nga magpunting sa National Assembly ug sa mga town hall sa tibuok nasud.
