Walay nakitang foul play sa napalgang patayng lawas sa usa ka 76-anyos nga lalaki sulod sa iyang panimalay sa Purok Lower 1, Barangay Tunghaan, lungsod sa Minglanilla.
Ingon man nga walay timailhan nga gihilabtan ang personal nga mga butang sa biktima, lakip na ang mga mahalong butang niini.
Giila ang biktima nga si Alfredo Bacor Dy, biyudo ug residente sa nahisgutang lugar.
Una niini, nireklamo ang mga residente sa maong dapit tungod sa baho nga natimahoan nga gituohang gikan sa balay sa biktima.
Dali nila kini nga gi-report sa mga residente ngadto sa otoridad aron masuta ang tinubdan sa baho, nga daling girespondehan sa sakop sa Minglanilla Police Station, Municipal Disaster Risk Reduction and Management Office (MDRRMO), ug mga opisyales sa barangay.
Gipugos pag-abli sa mga otoridad ang pultahan sa maong pinuy-anan ug napalgan ang biktima nga wala nay kinabuhi ug wala nay sapot sulod sa iyang lawak.
Atol sa pagresponde, napalgan ang nadunot na nga lawas sa maong biktima ug anaa na sa parasitic infestation.
Matud usab sa mga paryente ni Dy, taud-taud nang nag-antos sa daghang komplikasyon sa kalawasan ang maong biktima lakip na ang hypertension ug sakit sa kasing-kasing.
